HARMONI INXHINIERIE

Kurdoherë që klientët e Defender kryejnë telefonata gjatë udhëtimit, luajnë muzikë apo ndjekin navigacionin satelitor pa ndërprerje, një pjesë e meritave i shkon Emma Kowalczuk dhe ekipit të saj.

Shumicës prej nesh nuk i shkon ndër mend se si e gjithë kjo teknologji funksionon në harmoni. Megjithatë, Emma mendon për këtë. Ajo do të thoshte se gjithçka ka të bëjë me pozicionimin e duhur të antenës së automjetit për performancë maksimale. Si edhe me përputhshmërinë elektromagnetike. Thënë thjesht, bëhet fjalë për aftësinë e pjesëve të ndryshme të pajisjeve elektronike për të funksionuar pa ndërhyrë te njëra-tjetra. Kjo ndërhyrje njihet si bashkëveprim dhe duhet që të shmanget.

Si Përgjegjëse e Sektorit të Elektromagnetikës, Emma drejton një ekip të përbërë prej inxhinierëve ekspertë, që përdorin simulime kompjuterike për zgjidhjen e një problemi kryesor. “Gjithçka ka të bëjë me përçimin e sinjaleve elektrike nga jashtë automjetit te klienti brenda tij, që mund të jetë duke shkarkuar softuerë nëpërmjet internetit ose luajtur muzikë gjatë udhëtimit”.

Klientët presin që automjetet të funksionojnë gjithnjë e më tepër si telefona inteligjentë. Ekipi që Emma drejton është i vetëdijshëm për këtë. “Ne dëshirojmë ta realizojmë këtë lidhje dhe përvojë brenda automjetit. Duam që automjeti të kryejë çdo funksion që kryen edhe telefoni juaj. Prandaj, për shembull, është shumë e rëndësishme që të merret parasysh pozicionimi i antenave në automjet. Në këtë mënyrë, do të mundësohet funksionalitet i ngjashëm me atë të telefonit”.

Ky funksionalitet përfshin përditësime në distancë. Puna që Emma ka realizuar ka shërbyer për teknologjinë e përditësimit të softuerit nëpërmjet internetit (SOTA) të JLR, duke u mundësuar klientëve të Defender që të marrin përditësime pa qenë e nevojshme që të vizitojnë Shitësin e autorizuar. Së fundmi, kjo punë ka përfshirë edhe instalimin e njohjes së zërit për Amazon Alexa, një shtesë që shumë prej klientëve mund të mos e kenë pritur.

“Shpresoj që klientët do të mendojnë se përfshirja e kësaj veçorie nëpërmjet internetit, pa qenë e nevojshme të shkojnë te Shitësi i autorizuar, është e dobishme. Nëse do t’u duhej të shkonin te Shitësi i autorizuar, kjo mund t’u dukej një pengesë e madhe”.

Antena që e bën këtë të mundur ndodhet brenda një strukture të vogël në formë pende, të vendosur në pjesën e sipërme të Defender, në drejtim të derës së bagazhit, dhe kjo për një arsye konkrete. Sigurimi se antena funksiononte siç duhet ishte një kontribut i konsiderueshëm ndaj projektit në tërësi.

“Nëse do ta vendosnim antenën në një pozicion të papërshtatshëm, atëherë gjasat për të kapur sinjalin do të pakësoheshin ndjeshëm. Mund të vendosej në prapakolp diku fshehur, por karroceria metalike e automjetit mund të bllokonte lidhjen e komunikimit me stacionin e bazës celulare dhe kjo është problematike. I kemi vendosur në pjesën e sipërme për të siguruar një performancë lidhjeje maksimale”.